有人話做女人難，做女強人更難。但其實做事業愛情兩得意的女強人先至最難！華華好難至摷到一個，就係TOM仔CEO、人稱Tom姐或者孖T嘅湯美娟。繼年初接替王兟做CEO後，Tom姐今個月16號，會同拍拖好耐嘅彼得麥建光拉埋天窗做其麥太，真係好事停不了，如果一個唔覺意喺年底製造小麥成功，到時Tom姐真係年頭旺到年尾！

路邊社消息話，麥生同準麥太16號當日，中午會響尖沙嘴文化中心註冊，由於一對新人素來低調，所以冇大鑼大鼓，只係當晚響跑馬地Amigo包場宴請親朋，不過Tom姐都有畀帖公司幾個部門阿頭，咁有冇請埋大股東超人同周小姐？到時落跑馬地睇吓咪知囉。
娶得年薪過千萬嘅Tom姐做老婆，當非等閒之輩。據聞麥生係TOM姐安達信時代嘅同事，𠵱家係華雋創業投資管理（深圳）董事總經理，又係華寶國際、廣州廣船獨立非執董，企業融資、IPO同埋收購合併都係佢強項，絕對唔係Tom姐所講「冇咩做」，華華見過佢，高大威猛好MAN㗎！除咗搵錢叻，麥生LUMTom姐都有一手，例如前排TOM仔周年晚宴，Tom姐帶埋麥生見吓班同事，阿麥生上台唱咗首情歌送畀佢呢！
李華華