合拍劇《使徒行者2》噚晚播出第5集，好唔好睇就真係見仁見智，香港人又唔似得大陸觀眾可以一次過睇晒10集，所以要俾啲耐性煲劇。頭5集總共死咗11個角色，中間冇死人嘅兩集，就有麥明詩同宣萱呢個新角色登場，另外仲有袁偉豪連續賣肉，甚至着住白色泳褲、疑似「大鵰」現形嘅場面。(新聞連結： http://bit.ly/2xjDSt7 )

o依家啲觀眾，煲劇嘅層面又點會淨係睇主角，反而好留心劇中嘅道具、服飾同有冇講錯對白，結果有網民發現，喺前晚陳豪懷疑有人借公司名義放數，當宣萱去收數嗰陣，陳豪同埋啲手下一齊去捉宣萱，結果宣萱為咗甩身，將啱啱收咗嘅錢掟晒出車，製造混亂。

但係網民發現當宣萱打開個紙盒，有一個近鏡影住啲錢嗰陣，啲錢同以前嘅道具銀紙唔同，雖然有一半位置係做過啲後期加工，但係嗰張1000蚊紙幣上面，清楚見到嗰條全息開窗式保安線，而且亦唔係好多見有任何「道具」或者「樣本」字眼，甚至仲有別於過往嘅單面印刷，而係雙面印刷！

於是有啲求知慾極強嘅好奇寶寶，即刻走去睇番大陸版本，發現呢啲「道具」銀紙原來仿真度極高，喺香港畫面見到銀紙上嘅中國銀行總行建築物同銀行名稱，進行「後期加工」blur一blur，但效果依然唔錯。疑團解開後，有網民拎返幾年前港視嗰套《警界線》嚟講，嗰陣有人讚戲製作認真，除咗係實景拍攝之外，連道具銀紙都迫真過人，類似嘅場面，亦都曾經出現過，咁啱得咁橋，兩套劇嘅監製都係蘇萬聰喎。

之不過喺香港過往拍劇，關於執法機關，例如警察制服、道具、喺使用嗰陣有一定嘅程序同申請，道具銀紙嘅做法亦都要一樣，一定要整到好假，聽講唔可以同真銀紙同色同pattern，亦要有「道具」兩隻字，有啲仲話為咗唔會喺市面流通，用完之後要燒毀，今次呢個情況，真係唔知係咪製作太認真，抑或係合拍劇嘅關係，唔係太識規矩，又或者係人有錯手呢？