原來如此,咁就最好將啲內地生搬去港大鄰近地區居住。有人諗過,政府有咁多唔賣,或賣唔去嘅房屋,不如成幢租畀大學做學生宿舍,以上述讀者E講嘅例子,將內地生搬去校外宿舍,港大舍堂留番畀本地生與歐美學生住,不過,咁搞法,係政治不正確,人權不正確,有隔離主義之嫌,港大學生唔敢公開講出口,港大校方更唔會做。
捐錢起宿舍固然好,新地與郭氏兄弟合捐三千萬畀中大研究心理健康,精神健康,亦十分有意思。中文大學嘅情緒中心的三位「著名病人」曾智華、張堅庭及林建明曾公開承認接受診治,完全好番之後,積極幫助情緒病患者,好多好多人到中大要求診治,做到「情緒中心」班醫護人員索晒氣,窮於應付。兩年前一位人士患上「返工恐懼症」,朝早一話返工就成個人震騰騰,面青青。佢嘅親人從報紙知道曾、張、林嘅故事,打電話去中大情緒中心查詢,打足兩日都冇人聽電話,因為對方應接不暇喎。好彩後來卒之入到去求診,呢位人士經中大治療後,恢復正常,家人非常高興,但亦因此知道呢個中心唔夠錢,唔夠人。好咯,現在新鴻基地產及郭家捐三千萬畀中大做精神健康嘅工作,可以造福眾多嘅香港精神緊張、情緒不穩人士,值得讚賞。