早前華納喺「香港電玩動漫節2017」舉行《LEGO(R)旋風忍者大電影》啟動禮，公佈電影粵語配音版由倪晨曦(Elva)聲演戲中唯一的女忍者 - 水忍者赤蘭。Elva話：「可以配電影入面唯一嘅女忍者赤蘭，真係好興奮，因為我一直主力喺網上分享瑜伽、旅遊同美妝心得嘅片，對我嚟講，配音係一次新嘗試同挑戰，希望大家睇完之後，會鍾意我聲演嘅廣東話版本。」

配音過程中，Elva要改變自己嘅形象，化身成強悍女忍者：「今次對我嚟講係一個極大嘅挑戰，首先我本身嘅語氣比較溫柔，但赤蘭就有啲粗魯，配音時要同時兼顧咬字準確同變換聲調，而且動畫入面有唔少動作場面，真係好難，好彩有工作人員幫忙畀意見，打鬥場面，可以一邊配一邊跟住動作做，最後出嚟嘅效果都好好。」完成配音之後，佢即刻信心大增，仲笑話：「我感覺自己好有拍動作戲嘅天份，如果將來有打鬥角色，歡迎隨時搵我演出。」

Elva完成配音工作之後，後日就飛倫敦出席時裝周活動，佢今次係接受兩大品牌Burberry同Tommy Hilfiger嘅邀請，Elva開心話：「好期待呢6日嘅行程，以往都係以KOL，或者blogger身份參加外國嘅時裝週，今次係以藝人身份受到邀請做座上客都係第一次，心情有啲緊張，希望完騷可以順道周圍去遊覽當地潮流勝地。」