過咗賓架T呢一關，返到公司立即查書，但硬係查唔到「不斬樓蘭誓不還」呢句，只有唐詩（王昌齡《從軍行》）見：「青海長雲暗雪山，孤城遙望玉門關。黃沙百戰穿金甲，不破樓蘭終不還。」
一時之間查唔到，就此作罷，睇番幾封電郵，一啲不妨在此回答。一位先生問移民，涉及私隱，直接寫番封電郵畀佢，只不過左丁山唔識中文打字，只能用英文回覆，如有不便，鎖你鎖你！讀者Wilson問紫微斗數網頁，請你留意嘞，就係kankanwoo.com，屬中州派紫微斗數。讀者胡先生問呂可風嘅《紫微斗數精解》可以去邊度買？唔使多講，請你去商務、三聯書店，如果冇嘅話，打28512600，話左丁山介紹，可能有七折；至於你問讀完社工，再讀乜嘢課程好，理所當然係讀碩士啩？如果轉讀針灸、中醫學士，似乎轉晒行，花時間噃。匙羹點解匙柄有個窿？係賓架史丹利黃上考古學課程之後，話畀左丁山聽嘅，以後再傾。