當年今日
關於我們

隔牆有耳:迪士尼遊行流產 - 李八方

蘋果日報 2009/03/29 00:00


一班迪士尼fans心急樂園盡快擴建,喺facebook發動網友噚日遊行聲援迪士尼,要求港府早日落實注資打救樂園。遊行原定噚日舉行,可能要遷就返工嘅人,陣前有變改期至下個月26號中午,喺迎樂路噴水池集合。有網友指既然今次係幫迪士尼造勢,建議踩入樂園搞大佢,不過有人擔心樂園唔畀,所以應該都係喺外面搞就算。
據發起呢次活動人士表示,無論係遊行或集會,都會依正手續向警方申請,大原則係唔會妨礙樂園運作同滋擾遊客,大家都係想樂園好,冇理由搞寸個party。另一考慮方案係改喺旺角行人區或者去政府總部集會,唔會影響迪士尼,又可以畀多啲人見到呢個聲援活動。