隔牆有耳:立會新大樓玩慳電 - 李八方

蘋果日報 2008/03/16 00:00


立法會議員到2011年先有新大樓用,不過到咗2020年香港可能已經冇冬天……為咗留住夏天同藍天,立會行政管理委員會噚日扑鎚決定,新大樓嘅大會議廳(圖)只會喺舉行每周大會時使用,其他中、小型會議,議員同官員只可以用較細嘅會議室。
行政管理委員會噚日開閉門會議,八方聽聞議員為慳電環保,會上幾乎一致通過減低新大樓大會議廳嘅使用率,只可以喺每周三大會先可以使用,其他委員會會議就冇得book大廳開會,因為用大廳要開多啲燈,要用多啲電。講到環保,八方梗係贊成啦,最好開少啲口水會,仲慳得多錢!八方都好關心記者室安排,有議員指新大樓記者室佔地兩層,夠晒記者用,連示威市民都照顧埋,總之冇上蓋地方就可供遊行示威集會,不過有泛民議員擔心,將來示威區咁大,要班好多人馬嚟撐場,否則場地大,人數少,氣勢輸晒。