劉婉君（Sharis）與黃子華去年結束戀情後，今年一月子華高調偕新歡蒲蘭桂坊，而劉婉君又被雜誌拍得與已故九龍城大地主鄺命光的孫兒鄺祖穎約會。本月初她又帶廣告界男友Bosco亮相，想不到二人僅認識幾個月就宣布訂婚。
前晚Sharis與男友一起出席尖沙嘴美麗華酒店一個時裝表演時，甜蜜宣布訂婚。而黃子華對前女友傳喜訊，昨日表示會衷心祝福對方。
僅相識數個月
Sharis前晚行catwalk，男友Bosco陪伴左右，當記者看見兩人分別戴了一隻金銀戒指在中指，便追問Sharis是否已跟男友訂婚，初時她亦不想多講，在記者再三追問下，她才承認說：「今次訂婚係好自然發生，雖然我哋只識咗幾個月，但大家相處得好開心，佢對我以前嘅一切，包括同子華嘅感情都好清楚。其實一個人要有過去，先至有將來，最緊要我𠵱家知聽日同邊個行。總知我冇呃過佢。」
子華願意去飲
訂婚後Sharis認為是人生另一個階段，她說：「遲吓結婚同擺酒都會喺香港進行。講到波波（Bosco）為人，佢就乜都好、乜都正，同我結得婚嘅男人，梗係我最愛嘅一個。」
至於她男友Bosco則說：「我同Sharis係一見鍾情，雖然只識咗幾個月就訂婚，但我對佢已經好了解，老婆本亦夠晒，對佢嘅過去，我唔會介意。我係上個禮拜六（二十七日）同佢求婚嘅，訂婚戒指一共用咗五萬蚊。」
此外，黃子華昨日在尖沙嘴出席記者會，他表示對前女友Sharis訂婚不知情，子華說：「同佢好少聯絡，不過我衷心祝福佢，我梗會關心朋友啦，最緊要佢快樂，如果佢請我飲，唔撞期我都會去。至於我同女友，感情好穩定，但未有咁快諗結婚。
採訪：陳梅香
攝影：黃文偉