歐洲空中巴士（Airbus）生產的全球最大客機──空中巴士A380，早前首次喺香港降落，揭開本地航空史新一頁。不過，呢款客機因技術問題，一再延遲付運，多家航空公司相繼取消定單，有網民關注，呢個問題幾時先可解決。
Lifeguard911擔心，A380嘅命運會好似約30年前嘅和諧式客機（Concorde）咁慘，和諧機係尖端科技嘅結晶品，但因定單太少而成為歷史陳迹；預料空巴要解決好多問題，先可以令A380收支平衡。
SwissDude激動咁話，空巴母公司EADS嘅法國籍管理層唔夠班，應該將佢哋永久革職，由質素較好嘅接班人清理呢個爛攤子。
據資料顯示，每架A380造價約22億元，已接到15家公司定單，落實及承諾會購買的數目共166架，其中中國南方航空至少訂購咗5架，新加坡航空公司更是首架A380買家，但飛機原定今年底運抵新加坡，𠵱家押後至明年下半年。
正如網友所擔心，已有航空公司因此而削減定單，聯邦快遞取消咗10架定單，轉購15架波音777飛機。不過，A380最大客戶阿聯酋航空10月中表示，儘管A380第三度押後付運，亦不會因此削減原來定單。新加坡航空亦表示維持空巴定單。

載客量大　過關有排等

對於A380本身，網友則毀譽參半，經常搭飛機嘅cranky_flier嫌客機size太大，話將來一定唔搭A380，以免大批人排隊等過關、上機落機，同埋攞行李，嘥好多時間。
不過，A380擁躉EcoAuthorEldrige講，A380嘅噪音比美國波音747型客機少成半，運作效率亦高15至30%，夠晒環保；又有4個後備飛行控制系統，可能係全球最安全嘅客機。