甄妮在facebook狂插「房東」吸毒要加倍嚴懲,繼向太陳嵐出面怒轟甄妮狠毒後,昨日凌晨後輩吳國敬都在微博暗寸,指留意到甄妮發表的「偉論」,有感而發作了首歌叫《世紀老八巫》。阿敬昨日接受電話訪問,寸爆在新加坡開騷的甄妮:「好討厭,餐餐做騷出嚟鬧人博見報,但呢單黑心咗啲落井下石,好毒辣好嘔飯好核突。」
阿敬揚言搵志同道合朋友填詞,歡迎群星合唱,他說:「表明立場我同祖名父子冇乜交情,今次純屬睇唔過眼甄老太行為,抽水唔好咁毒辣,人誰無過,何必呢個時候踩多一腳。」至於甄妮昨在fb隔空反擊向太,還謂:「甄不會讓自己的孩子做藝人,那不是正常人可承受的苦。」