關心妍（Jade）喺港台頒獎禮齋坐食白果，一個獎都冇，當晚頒獎禮未完，佢已經即發微博話不再堅持，事後宣布退出頒獎禮專心造人。

今日Jade同謝婷婷﹑徐子淇及琦琦等，出席中環一間皮具店開幕活動。Jade就話其實一早決定今年係最後一年參加頒獎禮，佢仲話入行11年嚟，終於安樂同放鬆晒。雖然Jade口口聲聲話係「解脫」，但心裡似乎仍然有條刺，仍然耿耿於懷未能喺港台頒獎禮分一杯羹，佢狂吐苦水：「 係機制同我嘅努力不成正比， 我由頭到尾可以用生B做藉口，贏同輸我都爭取過。」

再追問係咪因為十優歌手不入而意興闌珊，Jade就呻爆：「跑咗咁多年， 11年嚟都唔夠10個獎 ，（退出）都唔係衝動啦。」佢有酸溜溜話鄧紫棋（G.E.M.）比佢幸運：「我好難先攞到少少嘢， 港台咁多年，都係拎咗3個獎 。」

講到有人係為唱歌而唔係為獎項，Jade就好坦白咁講：「考試唔為成績表，點解要考試先？ 我做主流音樂，有邊個唔想攞獎 ？」佢唔覺得係同公司規模大細以及時機問題，只係話頒獎禮規則問題：「係機制問題，係遊戲問題，我從來冇贏過，我唔係輕易放棄嘅人，唔係點堅持到11年。」不過最後Jade還是放棄﹑不再堅持﹗

Jade啊Jade，係時候解脫呀，唔好再耿耿於懷啦﹗