36歲黃子恆前日被爆偷嗒大陸女fans兼被指搞大對方個肚唔認數！點知一波未平、一波又起，噚日再被爆約35E巨胸歌手迪子去九龍塘玩「人魔大戰」，事後迪子承認此事兼鬧爆話：「梗係有啲嬲，咁樣問好唔尊重，即係佢當女人係乜呢？請問！我覺得你有需要咪去撳鐘仔囉，畀錢之嘛，呢啲錢都要慳！」(新聞連結： https://bit.ly/2PnSzjO )

迪子嘅好姊妺莊端兒，噚晚喺尖沙嘴出席首映活動，莊端兒話本身唔識黃子恆，迪子之前有同佢提及事件，但就冇開名：「嗰陣我仲喺度諗，窈窕淑女，君子好逑，都正常，我以前都收過好多曖昧訊息，好多男人都用漁翁撒網式追女仔！」唔知個網又有冇撒到佢嘅身上？佢就話：「冇喎，我都唔識佢，可能迪子當我好朋友冇介紹我識，但如果遇到呢啲事件，冇回應就係最好回應。」

莊端兒話當年都有教迪子唔好回覆，因為冇睇內容，莊端兒話唔敢亂回答。今次睇到黃子恆搞大咗fans個肚嘅消息，唔知有冇覺得男方做法猖狂？莊端兒話唔評論人哋嘅私生活，亦冇為咗呢件事聯絡過迪子。至於有冇覺得身材性感特別容易受矚目？莊端兒話：「都會㗎，我個IG inbox都收到好多性騷擾，有啲會影埋性器官嚟，我當睇唔到，試過有開價飯局，叫我去大陸食飯可以收過百萬。」

邵仲衡亦話有留意事件：「呢啲事情後生仔要自己留意，好心喇，可能同人品亦有關。」邵仲衡叮囑做藝人要謹慎顧及形象：「呢啲桃色糾紛嚴重影響自己嘅前途，人哋未必要唱衰你，喺好多地方都有呢啲事情發生，做呢行觀眾緣好緊要，無論你幾叻，幾靚仔靚女，都係形象行先。」邵仲衡仲承認自己都曾經遇過桃色事件，佢話：「凡事要自己控制，適可而止，話控制唔到就假，冇人信，要檢點啲，始終要顧住自己入屋形象，如果做到咁就不如唔好做，真係拜拜喇，祝佢好運。」

精選娛聞，喺晒《娛果》
http://fb.com/appledailyent