就算係藝人都係香港人，所以佢哋好多今日都選擇參與遊行，為香港為民主發聲。

龍小菌同糖妹個前男友何浩文（Dominic）今日都係由維園出發參與遊行，問佢哋有咩睇法？小菌就話自己身為香港人，覺得好嬲，認為政府唔係為香港人做嘢，特首完全唔理港人點睇：「最希望有真普選，每人一票選一個為港人服務嘅特首。」佢又話覺得吳亮星自把自為，仲覺得佢咁嘅身份做主席已經好有問題，申請撥款係納稅人嘅錢，而錢係應該為港人服務，希望司法覆核成功。

問到小菌勇於表達政治立場，會唔會怕影響工作？佢就話：「生活喺呢度，自己屋企事搞唔掂，點講其他嘢？」明寸梁振英家事外揚單嘢；又話明白其他公司藝人有限制，慶幸自己係獨立公司，可以自把自為咁話喎。

龍小菌表示，去到遊行尾站，即遮打花園會上台唱歌，問佢有冇呼籲藝人朋友出來？佢就話自己冇約人，費事人哋拒絕。但就有喺網上講今日自己會出嚟遊行。

至於Dominic又點睇？佢就好有火咁話：「依家個社會好差，香港所有人都應該企出來。依家喺香港，出街唔係人行，係篋行；朋友生仔要排床位，奶粉又買唔到，好多大家身同感受嘅問題。」談到周五財委會粗暴通過新界東北發展計劃撥款:「吳亮星根本好有問題．佢嘅身份根本就唔應該做主席，唔『makesense』，完全唔跟議事規則。」並謂最想嘅係希望呢件事司法覆核成功。