美國華爾街大行嘅行政總裁（CEO）今年花紅大豐收，有錢過肥年；但同人唔同命，該國有唔少人慨歎今年冇花紅。美國嘅貧富懸殊咁嚴重，引起好多網民不滿。
喺《華爾街日報討論區》，網友romesh話莫講出花紅，能夠保住份工已經偷笑，喺美國嘅汽車業同航空業，唔少人擔心會被炒魷。喺《MSNBC討論區》，rjhangover呻過去6年，最低薪嘅九成人平均只獲加薪2%，高收入嘅一成人平均加薪75%，至於最高薪嘅0.01%人，加薪幅度高達112%，實在好唔公平。

高低層26倍　貧富懸殊

KerryWonOhio講，美國嘅貧富不均問題，係所有工業國之中最嚴重。madmushroom話，美國嘅CEO貪婪成性，令當地貧富兩極化，將來恐怕會掀起階級鬥爭。不過，jojosnip挺美國富豪話佢哋好勤力，仲承受好大壓力，搞到經常失眠。wry-catcher就反駁說，美國總統喬治布殊做嘢唔係好搏殺，至於美國最大破產案嘅主犯──Enron前CEO萊伊更懶理公司事務。
國際管理顧問公司嘅調查發現，美國大企業CEO嘅薪酬係全球最高，平均約820萬港元；同低層職員差距愈來愈大，平均高26倍；英國亦有成16倍、日本係10倍。