【李八方online】「人一藍」系列：公民黨劉家衡被屈做援交「少女」
蘋果日報 2019/11/29 14:15
援交李八方藍絲劉家衡
原圖為求驗傳媒專頁截圖- 「求驗傳媒」澄清藍絲失實謠言。 （求驗傳媒專頁截圖）
- 有撐警藍絲喺FB話，「劉X衡」係「著名援交少女」，喺網上po艷照吸引大批色男。（網上截圖）
贏要贏得光彩，輸都要輸得有風度。好似唔少藍絲咁，自從建制派喺區選大敗後無自我檢討，然後怨天怨地經已相當肉酸，更加可笑嘅係佢哋老屈民主派當選人係援交「少女」，而被屈嘅當選人係男人。
話說民建聯鄭泳舜喺深水埗區南昌北，輸咗畀公民黨劉家衡。點知就有撐警藍絲喺FB話，「劉X衡」係「著名援交少女」，喺網上po艷照吸引大批色男，所以奉勸女仔要留意自己男友或者老公，有冇成日去搵「劉議員」。
真係唔知好嬲定好笑，最慘情係唔少藍絲都信，搞到好多人去咗真●劉家衡嘅IG問價。劉家衡就喺佢個FB話，早就估到民主派會被人抹黑，但諗都無諗過連自己嘅性別都要澄清，至於被人問價方面，佢講明服務街坊係唔收錢嘅。真係「人一藍，腦便殘」。