邱淑貞(豆斗)自從嫁咗人做埋媽咪後，都好耐冇喺活動做過訪問，噚晚為咗支持老公沈嘉偉嘅時裝店I.T代理Valentino而現身，同場仲有容祖兒、黃偉文同吳雨霏(Kary)等等。

沈嘉偉就好怕醜，記者叫佢同老婆合照時扭扭擰擰，豆斗咁耐冇公開亮相，連佢都話：「好掛住大家。」

講起接二連三嘅倫常慘劇，豆斗話好得人驚，聽博士講係因為幼童嘅針藥搞到新一代男仔易有自閉症，女仔多情緒問題，認為唔需要六合一嘅針藥： 「尤其麻疹易令腦受損，小朋友用精力對抗咁多菌會發燒，但腦部神經出錯，我哋唔知。」

豆斗又謂都擔心女兒有青春期情緒問題，但擔心都冇辦法：「讀書就要打，應該效法澳洲，畀人揀打唔打。」咁下一個BB去澳洲生？佢話： 「咁busy，仲生？」 佢盡量唔講跳樓等負面新聞畀啲女聽，以防佢哋入腦，令佢哋唔開心時鑽牛角尖，仲晚晚要氹個女瞓覺兼傾偈，有咁廿四孝嘅媽咪，啲女一定開心成長啦！





「第八屆金話梅電影選舉」又嚟喇。今年除港產片有獎攞，仲增設「最爛合拍片」獎。栢芝憑四套電影入圍「最爛女主角」，應該冇得輸。大家快快投票啦，結果將於4月12日在《蘋果》娛樂版揭曉。

公投網址： http://facebook.com/AppleDailyGoldenPlum