噚日先至話，胡定欣約埋黃智雯同李施嬅一齊返屋企慶祝農曆年，一班「胡說八道」嘅好姊妹聚下，點知姚子羚未有出席。唔知係因為忙於開工定係顧住個男友啦。

同日有周刊報道，指姚子羚自從年前硬撬JaniceMan牆腳、搭上有米的士行太子鄭子邦之後，一直樂做跟得女友，不時陪男友放狗，日前仲去咗大潭水塘拍拖放狗。

不過今日有讀者報料指，姚子羚上個月俾自己養嘅狗狗咬傷左面頰，需要縫針，故馬上停工休養云云。

⁠⁠⁠⁠⁠姚子羚回覆傳媒報平安，表示:「冇毀容，亦唔會因為咁樣而遺棄動物。佢哋好得意，多謝大家關心，唔回應咁多喇。」

據悉發生意外時，姚子羚係同狗狗玩緊，狗狗一時興奮，不小心咬傷子羚，但情況並不嚴重，縫針休養，至本月初如常出席活動，在化妝品掩蓋下亦難以察覺傷口。

狗狗性格活潑熱情，玩遊戲時可能因為一時興奮或者太肉緊，犬齒會不小心「及」到人，而並非因為有攻擊性，但傷者需迅速處理傷口及縫針，加快癒合。