啱啱寫完Y-3新舖，畀親愛嘅編輯話落筆似乎有些少唔客氣，其實我份人寫字同做人一樣，唔識轉彎抹角，有嗰句講嗰句，好聽啲叫直接，好多時就係寡得滯淡而無味，着衫亦如是觀，花俏大龍鳳從來唔上身，一來是個人喜好，二來身形亦Carry唔起，衣櫥連黑色咁有Character嘅顏色亦唔多，反而Natural色如灰、杏、米佔大部份，天橋品牌中以怪傑RickOwens最多呢類色，但係剪裁複雜尺碼偏細蝦人着到暈，一般歐洲碼着38嘅我試過要着佢嘅42，等到減價嚟買得落手都斷晒碼，好似上季一款灰絨長大褸，肩位好窄但又有Pleats，着上身似鐘樓駝俠。

一直以為RickOwens嘅衫咁難着，無色無相無Appeal又一啲都唔「女」，應該只係一小批「性格演員」先會鍾意，點知近日先後買到兩件類似RickOwens風嘅針織外套，一件係H&M我唔意外，皆因H&M跟天橋跟得咁貼，外國市場又咁大，口味廣泛總會顧吓少數派別嘅需要；另外一件竟然係本地薑GiordanoLadies，連咁OL嘅牌子都做怪傑影子衫，同道中人原來都唔少㗎。

@ahmi