【10cm的距離】囡囡就同爸爸一樣高 任達華:高啲着衫靚啲
任達華李冰冰琦琦
任達華同老婆琦琦噚日喺中環拍拖賀Tory Burch新店開幕,最近佢哋一家人愛上跳繩,華哥搞笑咁暗指老婆越跳越高,問華哥怕唔怕囡囡Ella高過自己?佢就話:「女高啲好,着衫靚啲,依家運動衫都可以着得時尚。」琦琦就爆Ella依家170cm,仲差10cm就同爸爸一樣高,仲話如果個女想做模特兒,佢一定支持,琦琦話:「模特兒健康又靚,學到好多嘢,可以放眼世界,不過依家都係讀好書先。」咁怕唔怕囡囡咁高搵唔到男友?琦琦就話:「我一樣搵到個咁好嘅老公,愛情唔係用高低分,高度唔係愛情嘅標準。」
噚日係三八婦女節,琦琦自爆戴住個女皇鏈嘴嘅頸鏈,係用嚟提醒老公,身邊嘅華哥即刻話乜嘢都畀晒老婆,仲話圍繞自己身邊嘅都係女人,佢話:「男仔好開心,喺女人堆,好有活力。」至於同場嘅李冰冰,華哥就話之前拍戲都有探過佢班,覺得佢又高又靚又打得,好國際化,再有機會都想同佢合作,仲搞爛gag話:「今朝冷冰冰,今晚李冰冰。」
而提到曾經合作並成為好友嘅全智賢一月生咗第二個,華哥就話好恭喜對方,仲話:「希望佢快啲修身,快啲出返嚟拍嘢。」華哥同靚女特別有緣,老婆就未驚過,琦琦話:「我從來冇呷醋,因為我老公好專業,令我好放心,我都好開心同欣賞佢。」
精選娛聞,喺晒《娛果》
http://fb.com/appledailyent
任達華同琦琦都話唔介意囡囡做模特兒,但要讀好書先。
韓國女團2NE1嘅前成員CL一身低胸裙相當火辣,拍照時更送上飛吻,又擺出誘人甫士。