可能係全港最多粉絲嘅英格蘭，亦步西班牙後塵，連輸兩場提早執包袱，謝拉特為利物浦隊友蘇亞雷斯「交出」靚助攻，成為眾矢之的。以波論波，謝拉特體力大不如前，失去中場發電機應有動力，只能做駁腳角色，高不成低不就。英軍領隊鶴臣卻未有即時作出調動，令球隊如同打少一個人，埋下輸波伏線。從股市角度睇，謝拉特尤如一隻末日輪，但現價距離行使價十萬丈遠，變廢紙乃遲早問題。投資者與其等奇蹟出現，倒不如早日換馬，話唔定有機會收復失地。
滬港通如箭在弦，本地券商股賣盤潮一觸即發，敦沛金融（812）及南華金融（619）相繼有第三者洽購，其餘同業聞雞起舞，時富金融（510）兩個月爆升近倍，第一上海（227）亦炒高六成，結好（064）竟原地踏步，炒落後一定揀結好！

博特息+賣盤　結好可吼

結好成立超過廿年，根基底子厚，絕對係內地券商青睞目標。公司業績交足功課，中期持續經營業務溢利按年升75%。早前向銀娛（027）出售澳門金都酒店及賭場業務，錄得逾5億銀特殊收益，全年業績將靚爆，手頭現金達13億銀，相當於市值近八成，本周四放榜話唔定會派特別息，點秤都值博！
唐牛愛隊荷蘭今晚鬥智利，由於首名出線大有可能避開巴西，故即使兩隊篤定晉級，亦都唔會hea踢，同時換來好賠率，由於得失球荷蘭佔優，故和波亦可首名出線，橙衣兵團平手盤有1.92倍，撐！

唐牛
https://www.facebook.com/tongcow88