現年31歲嘅無綫藝員楊明9月會同拍拖兩年嘅圈外女友去美國紐約結婚，不過馮仁昭噚日就收到讀者爆料，話楊明媾小妹妹，仲附上相片，一張係楊明同妹妹仔頭貼頭合照，但另一張個妹妹就掩住嘴彈開九丈遠。
楊明真係咁大膽臨結婚都仲咁花弗？馮仁昭打電話問楊明，佢即刻講得出係乜事。楊明話前日應有線節目《怪談》嘅陳譽之師傅邀請去書展，之後同師傅、師傅啲粉絲一班人去食嘢，個妹妹仔就係師傅其中一個粉絲，開頭成班人叫楊明同妹妹影合照，妹妹怕醜彈開咗，到臨走就正經影咗另一張。楊明話就嚟結婚仲俾人話媾女，都有啲唔開心，不過佢笑笑口話成日都係咁，冇得避。

咁講番啲開心嘢啦，楊明話9月頭會同女友先去馬來西亞影婚紗相，去嗰度係因為有贊助，佢都希望去熱帶地方影會靚啲，咁婚禮幾時舉行呢？楊明話喺大馬影完婚紗相之後會先返香港，到月中至出發去紐約結婚，都冇乜特別需要準備，因為女友啲親戚喺當地幫手籌備。到時一對新人好似梁朝偉首歌咁，瀟瀟灑灑的上機就得，去到幾時準備好就隨時註冊，連日子都冇定咁話。