韓國男團GOT7香港成員Jackson今日喺娛果facebook live同大家傾偈，大爆自己嘅生活習慣，原來Jackson瞓覺要喺一個好靜嘅環境先瞓到，有fans問見佢頭先玩遊戲戴眼罩，瞓覺又會唔會戴，Jackson話唔會，不過睡房一直要冇光同冇咩聲先得，即係Jackson係一個比較醒瞓嘅人。

Jackson自言未聽過「撒嬌」呢兩個字，主持阿仙解釋俾佢聽，佢即場擺咗幾個甫士，有心心手勢咁，講起點解佢之前由做劍擊運動員，轉變成為歌手，Jackson直言係因為有人嚟搵佢幾次，叫佢試吓做音樂，佢覺得唔想錯過呢個機會，起碼第時同番個孫講自己啲嘢。

有fans問佢成日講雞尾包，係唔係好鍾意食，成日食雞尾包做午餐?Jackson即露出為食樣，指好多香港嘢食都鍾意食，好似雞尾包、雙拼飯，仲話食雙拼飯一定要用香港製嘅豉油。

Jackson即場唱咗佢首新歌《OKAY》，首新歌係一首sad歌，主持有問佢點解sad?Jackson扮晒嬲嬲，企起身走開：「你都冇聽過我首新歌。」跟手又笑笑口行番入鏡，認真鬼馬，問起佢平時點拎創作靈感，Jackson指自己冇刻意去創作，有時係聽吓人哋啲歌、有時可能係揸揸下車、有時係工作做做吓嘢就會諗到一啲靈感。

講到佢有好多fans，同時都有啲人批評佢，Jackson輕鬆咁話o依家已經唔介意人哋點睇佢，佢認為如果care人哋點睇，因為呢啲事唔開心，就會忽略咗care自己嘅人，「就算你話我，都係睇緊我嘅嘢，反而最怕係啲人唔再睇我」。

Jackson又話唔介意女仔撒嬌，不過就唔好太過over，當佢聽到主持阿仙講咗幾次「撒嬌」呢個字，佢似乎有啲抗拒，未知佢係唔係唔鍾意用呢兩個字，目前佢喺韓國冇同團員一齊住，自己同一個音樂人一齊住，屋企有一個studio，大家都係做音樂，有時可以一齊玩吓，叫吓外賣返屋企，唔會自己煮。

Jackson喺香港讀書，佢話自己最鍾意香港嘅地方係九龍塘窩打老道嘅「紅牆」，有好多回憶，仲有就係體育學院，因為佢由細到大都係喺嗰度學劍擊。

佢直言上綜藝節目玩得好放，Jackson更自爆有計劃出廣東歌，仲係同人哋合唱，之但係為咗保持神秘感，暫時唔講得。