𠵱家係買家嘅天下，業主為求賣出單位，唔單止價錢要一減再減，重要就得個客㖭，唔係個客行咗去買第二間，咁自已嘅單位真係又要有排等至賣得出嘞。
好似九龍灣麗晶花園有位業主，一聽到有客還價，嗱嗱臨由內地趕返嚟簽約，皇天不負有心人，成功賣出個單位。
中原地產德福分行經理陳鳳霞對蘭西講，個單位係麗晶花園十二座低層B室，面積470呎。業主喺內地工作，諗住移民，所以喺一個月前放售，自由市場開價90萬，但就冇下文，惟有減到77萬試吓。
早前終於有個客睇樓，但後嚟去咗幾日旅行，返港後安排個女睇多次，還價73.8萬，業主喺內地聽到有人肯買，返緊工都嗱嗱臨趕返香港，兩個鐘頭內簽約作實成交，呎價1570蚊，個單位早兩年用咗近八萬裝修，所以個價都算幾筍。業主自住10年平手離場。

星濤灣體貼買家
市道不景，發展商賣樓提供優惠同付款方法畀買家揀，但未必啱心水，所以要聽吓買家心聲。
嘉華地產嘅馬鞍山嘉華星濤灣，早排加咗項三十六個月一同二按免息供付款方法，嘉華地產高級物業經理陳玉成講，原來係順應買家要求而設嘅。
陳玉成重話，若果買家喺嗰段時間咁唔好彩失業，都唔使為供樓徬徨，可以慢慢搵過份工。嘉華星濤灣預計入伙日期為後年4月。