當年今日

為羞家新聞影響採訪心情

蘋果日報 2002/09/29 00:00


嚟到釜山亞運會,滿以為可以專心採訪各國選手在競技場上公平較量,點知港乒女將中有三位前中國球手資格出咗問題,搞到滿城風雨,連累小記兩日來被呢單羞家新聞煩住,心情認真麻麻。

沙翁睇唔過眼
講真,球員參賽資格嘅嘢,應該喺各總會管理層的專業工作,一唔應該博懵,二更唔可以走法律罅;前港協暨港奧委會會長沙理士在亞奧理事會公布完結果後,向記者爆咗一句好精警嘅,佢話,亞運精神係公平競技,若果帶埋律師嚟亞運會,挑剔條例,啲風度就蕩然無存嘞!
原來沙翁見到有港乒總有高層帶埋律師嚟到,對條例篤到實,當然唔高興。話時話,呢單嘢唔單止沙翁睇唔過眼,我哋做記者都蒙羞,嗰班外國記者見到「中港一家親」搞到球員資格唔清唔楚,𠵱家嘅決定就更貽笑大方,唔成為國際體壇笑柄才怪。
好心乒總同港奧委搞清楚啲條例同埋明確執行,唔好「偷雞」嘞,因為受害嘅始終係運動員!大路啲打好成績才會受到各方尊重。