日前於超市買嘢未有付款離開而被扣查嘅龍小菌，傍晚到尖沙嘴文化中心，欣賞經理人演出嘅舞台劇。

兩人於開場前接受訪問，龍小菌身穿黑色裙現身，佢受訪時表示：「休息咗一日好返好多，心情都平復嘅，不過都有啲擔心，交咗比律師處理。」

佢又話：「個心都定嘅，冇得驚，未知結果係點，都係等。」問到會否擔心因此事影響形象時，佢話：「其實有因為呢件事而反思，因為自己好多大頭蝦嘅經驗，要警惕自己小心做。當然會有影響啦，因為誠信唔係一朝一夕建立。」

問及有否影響工作時，佢話：「其實今年都係集中讀書，冇乜特別安排工作。」佢又指事後好多朋友及親屬關心佢。當問到有否作最壞打算時，佢話：「未諗，呢啲要問律師，我仲未問。」