前日進行嘅英超聯「拆禮物日」賽程，唔少球員都收到「雙份」禮物，講緊嘅係同日有好幾位球員入波起孖！好似曼聯嘅基斯坦奴朗拿度、車路士嘅杜奧巴、熱刺嘅廸科爾，以及樸茨茅夫嘅派密斯。後兩者嘅表現，更加「如有神助」！
基斯坦奴朗拿度及杜奧巴兩人，今季都已經試過喺聯賽梅開二度，甚至乎大演帽子戲法，所以都唔算係咩新鮮事。

虔誠教徒齊有「士哥」

廸科爾雖屬國腳級射手，但之前喺熱刺一直未能站穩正選位，喺「拆禮物日」就今季首次喺1場聯賽入兩球；派密斯呢位中堅就更加唔使講，對上一次喺聯賽取得入球，已經係前季嘅事，仲要咁啱得咁蹺，嗰場比賽又係喺「拆禮物日」進行！當時樸茨茅夫就係憑派密斯嘅入波，作客以1:0擊敗水晶宮。
上周六喺英國嗰邊播出，由英國廣播公司製作嘅最新一集足球節目《FootballFocus》，其中一節趁住聖誕節，訪問咗幾位篤信基督教嘅球員，講吓佢哋信奉耶穌基督嘅虔誠態度，廸科爾及派密斯兩人，就正係兩大主角。結果兩人都喺呢個聖誕節有咁勇猛嘅表現，唔通真係有神迹？
「我求大俠並非基督徒，尊重各人嘅宗教信仰。廸科爾及派密斯之所以有咁好表現，當然唔可以淨係歸功於神迹，佢哋嘅堅持態度亦相當重要。」