美國唔少地區舊年通過反移民法案，仲發表敵視移民嘅報告，理由係非法移民搶走好多低技術職位，而且佔用醫療保險經費。一時間，反移民風甚囂塵上，但時間證明，反移民法案不得人心，反移民風潮亦難成氣候。
romesh喺《華爾街日報》討論區話，美國部份僱主貪人工平，聘請黑市勞工，令到土生土長嘅美國人冇工做。所以呢類老闆應該被重罰，仲建議每請一名非法勞工，應每日罰款1000美元（約7800港元），咁樣先起到阻嚇作用。
davelentz講：「由於黑市勞工可以幫公司提升盈利，所以呢類公司應該被罰款，將賺多咗嘅錢『嘔』番出嚟。計我話，初犯企業應繳交相當於115%嘅非法盈利罰款，再犯就要將兩倍非法盈利充公。」
JSAlex000認為，美國僱主如果請唔起本地勞工，可以將工序外判，唔一定要請黑工；佢仲話聘請非法勞工嘅老闆，應被罰款兼坐監。

54%網民贊成

該報調查發現，喺3049位有份投票嘅網民中，54%認為聘請非法勞工嘅僱主應被罰款；25%甚至支持判監；6%人主張用其他方法罰佢哋；但亦有15%人唔贊成施加懲罰。
marvolson講：「美國政府未能有效阻止非法移民入境，當地公司喺聘請員工時，亦唔易察覺應徵者係黑市勞工，所以話，老闆唔應該因為請咗非法勞工而受罰。」
美國反移民法案推出時，大多虛張聲勢，但執行時通常面臨挑戰，最終只能黯然收場。事實上，一些惠及非法移民嘅法案，今年來已喺該國部份地區推出。加州州長阿諾舒華辛力加早排就宣布，非法移民嘅仔女可以參與全民醫療保險計劃。