ViuTV嘅《跟住矛盾去旅行》，噚晚播出兩代女神連詩雅（Shiga）同葉蘊儀去旅行，佢哋去咗意大利，佢哋首先喺年齡、身份同背景上都真係好大差距，葉蘊儀現年43歲，佢出道早，仲已係兩女之母，連詩雅就得27歲，現職歌手同模特兒，節目中葉蘊儀有藐爆Shiga。

Shiga全程係咁用「ABC港女tone」講嘢，葉蘊儀都啲不屑，網民對於Shiga嘅「ABC港女tone」多數都表示反感，「連詩雅係咪唔識講廣東話?口音古古怪怪，想扮ABC定點?作狀到呢」、「好難頂呀，佢把聲同佢啲口音」、「陽光勃勃，夠晒頂癮」及「有幾多人一路反白眼＆唞大氣一路睇連詩雅」。

連詩雅今日電話回覆《蘋果》話：「我個回應就好簡單，一個新嘅電視台啦，有一個新嘅節目，都有好多人去留意呢件事，都係一件好開心事，都冇乜特別想講。ThankYou。」簡短回應，連詩雅繼續晒「ABC港女tone」晒英文。

對於，網友對連詩雅嘅意見，連詩雅就話：「同埋我想加多句，我覺得出到嚟節目嘅效果，可能每個人有唔同想法，對我嚟講係好難忘經歷，點樣都好，對我嚟講係留下好好嘅回憶，就係咁啦。」

隔了半小時，Shiga再透過短訊回答，佢仲講番同葉蘊儀出trip嘅感受，佢話：「其實一開始搵我同葉蘊儀拍《跟住矛盾去旅行》呢個一個節目，當然就係因為覺得我們好唔同，代表不同年代的人所以先可以擦出到呢個矛盾，事實上我哋真係唔同年代當然會有唔同嘅生活習慣。一開始我都很清楚呢一點，但係對於我來講我反而覺得可以有一個機會同一個呢一行嘅前輩出trip和工作，其實係難得既同一定會有一番體會所以，呢個trip我係覺得很愉快，而且覺得好難忘。對於觀眾嘅評論，我覺得每個人都有佢哋發表想法嘅權利，正如每個人都有自己嘅生活方式，而且我亦都明白到，好多嘅劇情都係節目的效果，所以我唔會太過介懷。都係個句，對於我來講都係繼續做好自己。」