房祖名衰花心出局
薛凱琪轉軚冧方大同

蘋果日報 2007/04/30 00:00


薛凱琪(Fiona)自前年與房祖名合作電影《早熟》被傳撻着後,二人多次被發現結伴外遊,但因經常有惹火女郎向房祖名投懷送抱,加上日前房祖名在中環舉行派對期間竟當着Fiona面前醉攬王秀琳,近日Fiona似乎已感到心淡,決定轉投方大同懷抱。前晚Fiona高調與方大同到戲院睇愛情片,擺明向花心蘿蔔還以顏色。
薛凱琪前晚與方大同相約在金鐘太古廣場見面,約8時45分Fiona首先現身,當時她邊行邊講電話,然後前往地庫快餐店TheMet購買三文治和飲料,原來Fiona本相約方大同在快餐店碰面,但方大同抵達時發現記者蹤影,即極速竄入廣場小巷,又第一時間致電Fiona通風報信,結果Fiona將食物打包,然後極速逃離現場。
任影唔嬲
高調擺出勝利手勢
至晚上約9時半,Fiona與方大同再次現身太古廣場UA金鐘戲院,不過,今次二人一反之前的鬼祟態度,不但並肩而行任影唔嬲,而且方大同更擺出V字勝利手勢。在戲院逗留約2個多小時後,Fiona與方大同於晚上約11時45分離開,雖然早知有記者在場等候,但散場時二人仍選擇從正門離開,方大同為Fiona推門顯風度同時,二人又笑笑口跟記者打招呼,甚至企定定接受訪問,表現出奇高調。
Fiona一見記者即風騷地笑說:「咁多記者喺度嘅?好似開記者會咁嘅。」問她看了哪一齣電影時,Fiona指是《愛在遙遠的附近》(ThePaintedVeil)。再問她為何之前碰見記者如此閃縮?Fiona說:「冇咁嘅事,我其實想搭𨋢上去飲Starbucks,又想食下邊嘅嘢,咪買外賣上去食囉!」
提到房祖名日前在Dragon-i舉行的派對上醉攬王秀琳(Mango),二人不時依偎咬耳仔,狀甚親熱,問Fiona可會介意時,她即表現大方地說:「我冇所謂,況且嗰啲場合好嘈,所以講說話會靠近啲同大聲啲啫!」記者再追問她會否介意?Fiona故作輕鬆說:「唔介意,朋友嚟之嘛!」
記者問Fiona和方大同睇戲後準備到何處拍拖?初時二人未有正面回答,其後Fiona表示會返家。記者追問是返誰的家時,Fiona即嚷道:「嘩,乜你哋諗埋啲咁污糟嘅嘢㗎,我梗係返自己屋企啦。」問方大同會否護送Fiona返家時,他表示不需要,Fiona即插口說:「佢不嬲唔gentleman㗎啦!」二人結伴欣賞愛情片,究竟有沒有發展機會?Fiona笑道:「問啲嘢咁老土嘅!」
合拍喪笑
無懼曝光唔會避忌
記者再問Fiona日後是否還會大方地跟方大同一起睇戲時,她說:「嚟得PP(PacificPlace)睇戲仲唔大方?其實之前成班朋友嚟睇,今日係咁啱夾到方大同之嘛!」方大同聞言竟發晦氣說:「男同男就話基,女同女你哋又寫,男同女又話拍拖,好無聊囉!」
Fiona跟方大同打情罵俏的跟記者談足15分鐘,二人臨走前,Fiona笑指這麼多記者在場,令她感覺如開記者會,方大同聞言即說:「好似你call人嚟咁喎!」二人隨即合拍喪笑,之後便各自搭的士返家。
此外,方大同昨日在中環出席「MOOV一大個生日會」時,強調與Fiona是好朋友兼同事,也不介意與房祖名三人行睇戲,他說:「我哋都覺得(緋聞)問到悶寫到悶,之前講過唔會避忌,以平常心看待,最希望啲報道唔好作得太誇張。」
採訪、攝影:娛樂突發組、馬建華
最高蘋嬸
有成龍前車可鑑,佢個仔房祖名似乎都唔係一隻穩陣股,睇怕薛凱琪都係趁早拋售好啲!
empty
empty
雞咁腳走
本來相約Fiona在快餐店見面的方大同,一見記者即拔足逃入小巷,並以電話向女方通風報信。
empty
《後大方》
V字示威
方大同與Fiona其後大方一同現身,前者更擺出V字手勢,莫非示意自己得咗?
empty
共享浪漫
Fiona前晚與方大同結伴到戲院睇愛情片,認真甜蜜蜜。
empty
打的返歸
散場後,Fiona二人各自乘的士返家。
empty
此情不再
房祖名經常有惹火美女投懷送抱,令薛凱琪難以忍受。資料圖片