今年對卸任立法會議員嘅前民主黨主席劉慧卿，相信輕鬆好多，例如唔使喺議會打反修訂《議事規則》拉布戰， 慳返好多時間，而選過立法局、立法會選舉7次，次次都贏卿姐，離開議會後就週遊列國，過住啲好似閒雲野鶴嘅生活，只係最近有一次旅程令到佢有少少困擾。

八方最近見到卿姐，就問佢新年新願望，係咪包括普選同航班一樣，「Delay No More」？點知一講就即刻被卿姐訓示話：唔准講粗口！又唔使咁敏感，卿姐息怒呀！佢諗咗陣就話，民主普選快啲嚟到，當然係佢願望，佢同時好希望北京可以尊重香港人，八方相信呢個都係港人嘅共同願望嘅，唔知中南海嘅「袞袞諸公」，聽唔聽到？