患有一種罕有兼會影響神經細胞癌症嘅新特蘭小球迷巴特利羅利,由於癌症再次復發,未來幾周就要開始隔離,佢嘅願望就係喺光明球場入波,所以喺新特蘭迎戰車路士開波前,兩隊就邀請巴特利一齊熱身,車仔前鋒迪亞高哥斯達仲教佢點射波,等佢可以射破門將比高域嘅十指關,場面好感人;喺賽事戰至五分鐘嗰陣,兩隊球迷仲一齊為巴特利鼓掌。
可能好心有好報,車路士就憑法比加斯一箭定江山,以1:0擊敗黑貓,聯賽10連勝,仲以六分拋離次席嘅利物浦,肯定可以成為今季聖誕冠軍。過去六季,有五支聖誕冠軍可以順利奪標,車仔本身亦試過四次成為聖誕冠軍之後捧盃,認真好兆頭。