白雲、唐曉彤（Kiko）、菊梓喬（Hana）今日到九龍灣為泰拳比賽過磅儀式擔任嘉賓。白雲去年減肥學泰拳，佢老公鍾意健身同騎馬，大家平時做唔同運動。白雲話：「稍後會拍新劇做保鑣，自己學到嘅嘢可以大派用場。」

白雲結婚之後過住富泰生活，經常喺網上展示旅遊玩樂行蹤，佢否認婚後減少工作量，仲話：「以工作為先，所以都冇乜post食物相，因為日日勁減肥，希望再瘦多十磅。」一身豐滿身材係賣點，老公會唔會心痛瘋狂減肥？白雲話：「男人就係咁㗎啦，見到你減肥又話你肥好睇， 佢講嘢我聽一半好啦，實際上覺得佢鍾意我瘦啲，因為一齊咁耐我都咁飽滿，瘦啲對於佢嚟講有新鮮感。」至於生B，白雲就話兩公婆有共識，再過幾年希望雙方事業穩固先。

菊梓喬（Hana）入行前打過一年泰拳，今日嚟到現場見番好多前教練，可惜入行後就懶，停止咗打泰拳，之前一直計劃參加泰拳比賽，但後來公司驚佢毀容唔贊成。Hana話打泰拳名正言順睇仔：「咁佢哋又真係幾好睇嘅，不過自己就唔鍾意太乾、無脂肪鋼條型男士，覺得有少少肉適中好啲，打拳嘅男仔好man ，感覺健康。」