衛詩雅、「巨胸翠如」鄧月平、陳柏宇、樂隊Dear Jane及曾若華等，今日喺灣仔出席Yahoo「速食電視」發佈會，嚟緊會喺Yahoo平台上會播出一系列自家製不同類型嘅短片，仲搵咗唔少藝人參與，包括搵鄧月平利用行人綠燈嘅30秒時間去做表演，而衛詩雅同苟芸慧等就用第一身鏡頭主持女神陪網民食飯。

喺活動上仲播出衛詩雅以第一身向網民撒嬌嘅片段，不過台上嘅佢睇落就有啲尷尬，事後佢受訪時就話：「好怕醜，睇番自己呢個樣好唔習慣，就算要對男仔含情脈脈俾自己睇番個樣都係好唔知點咁。」

講到日前本來要同周柏豪到上海電影節，可惜遇着航班延遲結果要喺機場過夜，衛詩雅話當日原本傍晚7點機：「上到機等等吓到淩晨兩點，機長話航班取消，撞正外面紅雨又要等一輪先返到入機場，大家更索性喺機場入面過夜，到第二日朝早機再飛。衛詩雅話成班人一齊喺機場過夜，感覺好好玩，好似細個去camp咁。」

另外，鄧月平就喺30秒節目入面，喺馬路中心表演打拳，近來愛跳鋼管舞嘅佢，被問到點解唔表演跳鋼管舞？佢話：「其實本來都想嘅，但係學藝未精，如果可以攬住條燈柱，其實都幾好睇。」話到自己都喜歡上跳鋼管舞，o依家keep住一星期上兩、三次堂，不過仍然係屬初學者階段。