當年今日
關於我們

  澳回歸油畫 四姨太得寵 - 李八方

蘋果日報 2002/01/21 00:00


何鴻燊投資嘅澳門旅遊塔前晚首次舉行時裝展,雖然唔係政經大事,但澳門特首何厚鏵都畀面出席,認真唔話得!八方無意間發現塔內掛咗慶祝澳門回歸的大型油畫《千禧──喜慶澳門回歸祖國暨邁進廿一世紀》,一睇就知出自中國著名畫家劉宇一手筆。
八方逐個人物睇,中央重心位置,係國家主席江澤民與澳門特首何厚鏵並排,江主席更準備為醒獅點睛。澳門賭王何鴻燊亦企前排位置,咦!賭王四姨太梁安琪都有份喎,重企響何超瓊旁邊,至於賭王其他太太呢?八方搵晒幅畫都唔見,四姨太響賭王心中嘅地位可想而知!

出自大師手筆
話時話,劉宇一最擅長以大題材、大場面、大人物作畫,經典作品包括《良宵》、《人民萬歲》等,而且幅幅都價值不菲,九七年賀香港回歸的《良辰》,就創中國畫史拍賣價最高,值二千三百萬港元。
呢幅澳門回歸又值幾多?八方八到北京,劉大師在長途電話中說:「《千禧》畫了一年左右,有名有姓的人物有五十至八十位,其他群眾幾十個,現在由何鴻燊娛樂公司珍藏。這次不是賣畫,不是商業交易,是重視一個歷史意義,放在旅遊塔中很合適。」至於內裏何故只有四姨太,無賭王其他太太登場,劉宇一則解釋畫作畫於九七、九八年,詳情都忘記咗喎!
不過,劉大師都好開心透露又有新搞作,就係為國家重新繪畫一幅開國大典巨畫,將懸掛於天安門城樓上,巨畫估計可於今年內完成,八方當然最關心畫中重點人物有幾多位,領導層排位如何,有無港澳政要在內?可惜劉大師話要賣個關子。


E-mail:[email protected]