當年今日
關於我們

【平地賽都掂】跳慣欄跑兩哩濕濕碎!日本欄王轟春季天皇賞

蘋果日報 2018/12/25 18:45

春季天皇賞長山之馬3200米跳欄王兩哩平地賽有馬紀念賽

今年日本有馬紀念賽(一級賽2500米)已於剛周日(23日)完成,全熱門「金之霸」不敵全場唯一的三歲馬「防爆裝束」做阿二,唔少馬迷都對賽果跌眼鏡。
不過,一眾日本地道騎師就一定好開心,因為土炮終於打破外國騎師的壟斷,贏番場一級賽,為自己友爭番口氣。
另外,日本跳欄王「長山之馬」亦都如願跑到今次有馬紀念賽,話就話得第九,成績齋睇唔算好,但係佢其實只輸畀冠軍「防爆裝束」約五馬位左右,亦快過同場跑第十的16年打吡冠軍「豐收節」一個馬頭衝線,證明呢匹欄王跑平地賽亦唔失禮。
幕後決定讓明年轉八歲的「長山之馬」繼續服役,並以3200米(兩哩)一級賽春季天皇賞做目標,因為佢跑開的跳欄賽最少都以3,000米起錶,長力一定冇問題。
不過春季天皇賞年年都幾乎爆額,欄王要攞到入場券最起碼要跑入公開賽組別,即最少要1600萬下獎金賽事贏馬,或者越級挑戰兼贏前哨戰阪神大賞典或春季錦標。