余香凝（Jennifer）、郭偉亮（Eric）、肥腸同張建聲等今日喺深水埗出席電影《3個綁匪7條心》宣傳活動，喺戲中飾演綁匪嘅張建聲話細個曾幻想做綁匪，仲會諗吓條肉參可以收埋喺邊，Eric就話自己曾經想過做馬伕，因為可以幫馬匹沖涼，張建聲搞笑話：「喺旺角做馬伕？」

佢哋仲話拍呢套戲時笑到肚痛，張建聲笑話Eric最搞笑，好有喜感，但Eric就話冇諗過做喜劇演員。而張建聲透露監製已經計劃原班人馬明喺年中開拍題材人性化嘅新片。講到染咗金髮成年，張建聲就話有甩髮情況，問到會擔心男人最痛變禿頭？佢就笑話：「叫親Justin都……好有才華。」

另外，喺戲中飾演肉參嘅Jennifer話自己喺戲入面係一個「變聲港女」，原來現實生活中Jennifer都成日變聲冧男友陳家樂，佢話：「我成日都唔小心變聲，當要求人做嘢或者o氹人嘅時候，會高幾度講嘢。」佢話對住家樂會唔同頻率嘅高音發嗲功，百法百中，問到男友係咪好受落？Jennifer話：「佢最愛最真實嘅我，不過女仔高音男仔都受落啲，我有諗過永遠轉呢把聲。以前嘅我覺得唔需要，人大咗見識多咗，愛情係要加份甜蜜。」

Jennifer又大讚男友體貼入微、愛屋及烏，有99分，問到係咪結婚對象？佢話：「1分留嚟進步，我哋認真發展，努力做嘢先，o依家仲細，好多嘢都未準備好，不過近排好多人結婚，去婚宴覺得好sweet，之前從來冇諗過擺酒，o依家諗會好想喺婚宴攬實媽咪喊。」

更多娛聞，喺晒《娛果》
http://fb.com/appledailyent

【minigame】2017瘋暈人物 返工打機唔使擇日
http://bit.ly/2CeWQkP