【新增圖片及內容】

現年28歲嘅韓劇《Doctors》女星朴信惠，不時與合作過嘅男星傳緋聞，包括《原來是美男》張根碩、《繼承者們》李敏鎬、《愛上Pinocchio》李鍾碩等，去年佢就被指與細佢一歲嘅《奇怪的搭檔》男星崔泰俊撻着，仲一齊去海外旅行，不過當時朴信惠就承認兩人喺海外見過面，但強調係偶遇並否認拍拖一說。

不過今日再有韓媒指朴信惠、崔泰俊正在拍拖，據《SBSfunE》指，朴信惠及崔泰俊已經拍拖逾1年，本身因為係中央大學戲劇系嘅前後輩關係而認識，加上係演藝圈同事及好友，所以就慢慢發展成戀人。

報道又引述相關人士透露，朴信惠及崔泰俊主要喺朴信惠位於清潭洞嘅住所約會，或者孖好友一齊去近郊出遊，而兩人拍拖嘅事雙方好友都知情，續指：「之前被報道過一次戀情，但兩人因為各自嘅原因未能公開，但亦無損兩人感情，更因為時間嘅推進令兩人嘅關係更穩定，周圍嘅人都感到開心。」

而朴信惠、崔泰俊嘅所屬事務所表示要向本人確認後先發表立場。隨後朴信惠方面否認戀情，表示兩人只係好朋友，不過韓媒《Dispatch》就公開咗多張兩人於去年8月及上月嘅約會照。據報道指，兩人係去到朴信惠父母開嘅烤腸店約會，又指兩人拍拖一事雙方父母早已知情。

由於被公開約會照，朴信惠最終反口認戀，稱與崔泰俊於去年底由好友升呢做戀人，目前正小心交往中，希望外界以溫暖嘅視線支持兩人。

更多韓流，喺晒《娛果》
http://fb.com/appledailyent