煲呔同攞命陳親手炮製嘅政治新貴，大部份未正式返工已經俾人噓到飛起，國籍、薪酬問題被批得遍體鱗傷，煲呔燒到埋身，民望勁跌，惟有下令成個特區政府不停做嘢，連一度俾人擺埋一邊冇搞作嘅中央政策組顧問劉細良亦要孭飛，為政治新手開雞精班特訓。
據講，特訓班好有針對性，例如上星期副局長、政治助理首次坐上枱開記者會，事前各人都已經接受訓練，仲搞埋模擬記者會，將所有記者可能問到嘅問題，全部預先排演，一問一答，確保呢班月薪十幾二十萬蚊，煲呔口中有質素嘅人才唔會出醜。終於，雖然有例如蘇錦樑要攞住貓紙答問題，但各人總算嚴守標準答案，講來講去嗰幾句，「好期望同嗰班高質素嘅公務員合作」、「我會虛心學習」、「我會同議員溝通」、「我會同傳媒溝通」、「希望大家畀啲時間我」。就算連表明堅持做新加坡人嘅伍潔鏇，同話會放棄外籍嘅徐英偉，口形個個都差唔多。

八方收到風，由於唔少公務員對班政治新貴嘅高薪同能力不成正比非常抗拒，煲呔亦知道要雙方磨合唔容易，最新搞作，係今個禮拜喺特首官邸禮賓府搞個酒會，邀請晒所有最高級嘅政務官，一共幾十人，同全體副局長同政治助理見面，等大家可以攞住杯嘢social一番，希望由輕輕鬆鬆開始，日後處理公事亦一樣有偈傾。
但有資深政務官就潑定冷水，指咁嘅場合大家只係見一見面，日後未必會再認得，況且喺唔同政策局工作，就算政務官之間亦唔相熟，煲呔咁嘅鋪排係冇作用。
煲呔當然諗住淡化爭議，但一班立法會議員當然唔聽佢支笛。噚日立法會公務員及資助機構員工事務委員會會議上，就通過一項冇約束力嘅動議，明剃政府眼眉。一班議員見煲呔用公家錢豪請政治新貴，即時坐享高薪職位，但新入職公務員就要經過三年加三年總共六年，至可以成為正式公務員，認為對公務員唔公平，通過動議，促謂政府取消「三三制」。公眾疑惑未消除，公務員又隨時擦出火花，睇嚟特訓班仲有排搞至可以畢業。

mailto:[email protected]