【新增影片】
英超升班馬為咗提升競爭力梗係要積極擴軍，其中紐卡素先後搞掂中場基斯甸艾素同後衛科利安利祖尼，白禮頓就暫時得門將馬菲賴恩一位新兵，反而哈特斯菲爾德就最積極，繼早前連破隊史轉會費紀錄簽入比利時前鋒迪普特列同澳洲中場阿倫穆爾後，以及從德甲緬恩斯借入門將祖拿斯盧素後，周二更瘋狂到一日簽3件！

除咗由車路士續借20歲升班功臣卡斯龐馬，以及由升班附加賽決賽手下敗將雷丁簽入自由身美國國腳中場丹尼爾威廉斯，最令人注目嘅收購應該係前英格蘭國腳恩斯嘅囝囝湯馬士恩斯。25歲嘅湯馬士恩斯喺2013至15球季先後為水晶宮同侯城喺英超短暫亮相，上陣15場射入1球，今次由英冠打比郡加盟簽約3年至2020年，並獲領隊華拿大讚：「所有人喺英格蘭都知道恩斯具備質素，多年來都係英冠其中一位最出色球員。佢曾經兩度短暫征戰英超，急切證明自己有能力立足，我相信佢會係核心一員。」

唔夠24小時內，哈軍到咗周三再添一員，以破隊史轉會費紀錄1,100萬鎊（約1.1億港元）由法甲蒙彼利埃簽入22歲貝寧前鋒穆尼爾，雙方簽約4年。穆尼爾去季喺法甲射入14球，贏得293次空中爭奪亦足見頭槌功架了得，交易原本喺早幾日已經落實，但因為蒙彼利埃會長早前去世而延遲公佈。