老蕭蕭若元與蕭定一兩父子之前話唔睇好樓市，呢幾個月卻一齊入市買豪宅，似係另一個「口裏說不，身體卻很誠實」嘅例子。
蕭定一今年中接受傳媒訪問時話，佢同爸爸睇法相近，唔睇好本港樓市，但佢為咗子女住得舒服啲，先至斥資1.5億元，買入西半山新盤殷然頂層複式戶。
唔通蕭若元又係想住得舒服啲？位於東半山肇輝台嘅詩濤花園，土地註冊處顯示，新近有個高層單位以3,800萬元成交，登記顯示，買家係蕭若元。單位實用面積達2,189呎，實呎1.7萬元。

喺自住單位樓下

詩濤花園上世紀80年代落成，出名實用，實用率逾九成，間隔四平八正好用。聽聞，蕭若元一直住喺呢幢豪宅，今次買入嘅單位，正正喺自住單位樓下。
單位對開嘅景觀好唔好就見仁見智，雖然前望跑馬地至渣甸山一帶景色，而且詩濤花園旁邊有一條樓梯可通往皇后大道東，幾分鐘就到灣仔，但物業居高臨下俯瞰全墳景，都算壯闊。
蕭若元𠵱家住緊嘅單位係2007年以佢老婆名義，斥資2,000萬元買入，家陣3,800萬元買樓下單位，可以話相隔9年，樓價大升約九成。話唔定，蕭若元已經對樓市前景改觀，所以先至把握機會入市掃貨喎。

李華華
mailto:[email protected]