內地報章報道，國壽（2628）母公司國壽集團打算作整體上市，又稱央企整體上市是早晚的事，集團正朝此方向努力。噚日國壽A+H停牌，待澄清呢個消息，其實此乃國家政策，「整體上市」呢四個字有排炒。
有整體上市概念，又上升幅榜嘅國企股噚日有成都普天（1202），單日升幅達26%，該公司為內地最大的電訊電纜生產製造商之一，控股公司中國普天信息產業集團為直屬中央嘅企業，規模極之龐大。不過，成都普天炒整體上市係好長遠嘅事，噚日開市前所公布嘅業績，純利大升3.9倍至1.39億元人民幣，先至係股價大升嘅主要原因。
雖然純利包括咗年內出售成都總部土地所得利潤，但係核心業務全線都有改善，營業額及毛利均有可觀增幅，同時出售電纜業務成功轉虧為盈，在去年主要原材料銅杆嘅價格不斷上漲情況下，業績可說係表現出色。

其實以往予人「發霉」形象之國企股業績大扭轉並非罕見例子，早前發表過盈利會大升預告嘅交大科技（0300），上周正式嘅業績顯示，去年度純利大升3.25倍至9048萬元人民幣，每股盈利有0.337元，比「盈喜」更佳。炒業績扭轉，經緯紡機（350）同埋東北電（042）都要昅實。
噚日鬼佬專欄作家MichaelPreiss講印尼新政府上台後致力打擊貪污及積極改革引進外資，謂印尼股市前景極之美好，去年股市明星係越南，今年輪到印尼。印尼概念股當然首選係持有Indofood嘅第一太平（142），呢輪升幅頗勁，第2隻諗到嘅係印尼華僑富商李氏家族嘅力寶系，其中力寶華潤（156）噚日破旗炒上，公司上星期宣布透過新成立的樂賓百貨連鎖店，拓展中國的零售業務，適逢國內最大百貨公司百麗搞上市，話唔定有得炒影子概念。