《搜狐網》係內地廣為人熟悉嘅入門網站，05年開始，佢哋每年都同集思策劃搞一次「全國網民最喜愛香港品牌」投票，噚日公布07年嘅結果，華華睇過，發現有啲特別嘢可以同大家分享。
喺頭10位中，莎莎集團同SaSaBeauty+、中原地產同利嘉閣齊齊上榜，兩個集團各有兩間公司打入十大，認真威水。

新商場人氣急升

聽集思策劃講，利嘉閣喺投票期間曾積極進行拉票活動，所以先可以高票數（1202票）當選冠軍，比第二位維他奶（644票）同第三位莎莎集團（632票）高出一大截，中原對手美聯集團，僅得子公司香港置業可以晉身三十大。
而06年嘅票王屈臣氏，今年就急跌到第11位，由1063票跌至得番364票。
三十大中，以行業分類，商場一項頭三名係新地嘅觀塘apm同沙田新城市廣場，及鷹君嘅旺角朗豪坊，apm同朗豪坊都係新落成冇耐，竟然比傳統商場受內地網民歡迎，兩個商場負責人應記一功。
呢個投票喺舊年12月到今年2月進行，總共有114家品牌俾人投票，結果收到35037個有效投票，比舊年嘅17572票多近一倍。《搜狐網》擁有1億個註冊用戶，每日瀏覽量達2.5億次，咁對打入前列位置嘅品牌，進軍內地市場會有好大優勢。