韓流「冰雪姊妹花」F(x)嘅Krystal同姐姐Jessica，喺主持嘅真人騷節目《Jessica&Krystal》入面成日都互爆大鑊，又成日整埋啲古靈精怪嘅嘢，俾大家睇到佢哋私底下傻更更一面。

噚晚播出嗰集，佢兩姊妹就去咗做腳底按摩，期間仲自爆年初一齊去完按摩之後嘅搞笑經歷添。

Krystal喺節目中話：「當時同姐姐一齊食飯，飲咗少少紅酒，有啲醉意，之後再去咗腳底按摩。嗰時大約夜晚11點幾左右喇，我哋用帽同頸遮住塊面，行路去按摩店。」

Jessica就接口道：「當時《來自星星的你》好hit，我哋兩個戴住帽咁同路人打招呼。」Krystal仲爆料話：「我哋見到經過嘅車仲大叫『BongBong啊！』，十足十千頌伊咁。」幻想兩個「女神」喺條街咁樣，又真係幾搞笑喎。

此外，因為喺節目入，面Krystal同Jessica成日都以潮look示人，佢哋兩個最近就被時裝品牌Lapalette揀咗成為代言人。

另外，Jessica噚日喺微博上就公開咗幾張素顏自拍照，仲喺鏡頭前擺出V字手勢同搞鬼表情。