《2017香港小姐競選》今日喺電視城進行首輪面試，大約今朝接近11時，有份參與面試嘅女仔陸續到達港鐵康城站，佢哋坐專車進入電視城，分批會見新聞界及評判，無綫高層杜之克與及監製陳旭亮喺面試之後會見傳媒。

今年有份面試嘅130位女仔當中，年齡最大係27歲，最細嘅就係17歲，唔少係喺海外讀書返港，或者返港就業，甚至有啲人仲讀緊中學，職業方包括護士、模特兒、秘書同文員等，但係同過往最大嘅分別，除咗多咗好多北方佳麗之外，亦有啲唔識講廣東話嘅外籍少女。

雖然面試嘅女仔嚟自五湖四海，質素亦頗為參差，不過杜之克話今年參賽者比過往嘅學歷高，唔少參賽者係碩士學生，0依家進行緊全球招募，不設海外佳麗，所以回流返港參選嘅比例都提高！問到外籍佳麗會唔會因為唔識廣東話而難入圍？杜之克就話唔好咁快用語言去決定，要睇整體質素！至於賽制方面，曾經有傳由評判選出而取消全民投票，陳旭亮話未有定案，要遲啲先決定，但係外景拍攝將會喺8月初出發，地點將會係亞洲區。