【中環】臨近聖誕普世歡騰嘅日子，好多藝人都趁佳節前出街買衫，準備到時着靚靚去party。前日唔知係咪約埋，先後有幾個女藝人、名人出動濕平買衫，講到慳家，點都唔及鍾楚紅（紅姑），佢喺中環名店出現，不過都係齋睇冇買，之後行過置地文華酒店嘅時候，仲遇到林建岳前女朋友陳浥萍（Monica），打完招呼兩個人分別離開。

前日4點鐘着住粉紅裙嘅榮文蔚都去咗中環置地廣場一間名店，佢入到去對一條同樣係粉紅色嘅連身裙特別鍾情，雖然先後試咗6、7條，最後都係揀咗條粉紅色，仲赤住腳通店行去照鏡，最後心滿意足畀錢走，前後都搞咗一個鐘。
之後大概5點鐘喺不遠處嘅ifc，人妻徐淑敏（Suki）同友人，化晒妝一齊喺連卡佛濕平，身邊當然唔少得Suki嘅黑人保鑣。講買嘢Suki就狠好多，衫褲鞋包羅萬有，走嘅時候，足足4袋有多要勞煩保鑣代勞。

而陳奕迅老婆徐濠縈同位女友人一齊去咗銅鑼灣自己間時裝店攞貨，徐濠縈身為時裝店老闆娘嘅打扮自然唔可以失禮，短裙仔配豹紋絲襪，好多後生女都唔係佢嗰皮，喺店內逗留咗差唔多一個鐘，佢攞咗兩條裙上番自己架私家車後離開。
採訪、攝影：黃曉程、羅德光

戲裡戲外，話題最強，立即收睇《動戲場》:
http://hk.movies.nextmedia.com/extra/list/