隔牆有耳：
愁人節　必睇警方冤氣報告　
單身狗慎防幸福指數影響身心 - 李八方

蘋果日報 2017/12/25 05:20

隔牆有耳冤氣報告單身萬歲
    街裏愛人一對對，互送鮮花千杯不醉……每逢有影皆雙嘅甜蜜蜜佳節，對單身人士嚟講卻係大節日裏，願望有伴侶。警方今年聖誕都代入單身族嘅空虛感，製作名為《冤氣報告》嘅短片放上facebook，報道員除咗為未有伴侶嘅人打氣高叫「單身萬歲」，順勢呼籲市民出街放閃時要留意各區特別交通安排，唔少網民大讚有創意兼有心思！
    「升級報導員阿安」喺短片中報告，每逢大時大節，香港部份地區會有大量人流聚集，做乜呢？咪就係打卡同放閃，仲引用「非正式統計」話，「當中情侶密度比一個成年男士的骨質密度更高」，高危地區不出中環、灣仔同尖沙嘴，話呢種佳節「冤氣」除咗「影響交通」，相關地區嘅幸福指數更達到15，屬極高水平，「有機會嚴重影響一班單身人士嘅心理健康」。
    empty
    警方聖誕期間會實施特別交通措施，確保市民順利放閃。香港警察fb短片截圖
    網民讚有創意
    為咗確保市民喺上述高危地區「順利放閃」，阿安話警方聖誕期間會喺上述地區實施特別交通措施，呼籲市民遵守現場警務人員指示，亦避免駕車前往受影響範圍，而運輸署網址就有相關封路詳情。
    阿安最後除咗好應節咁祝大家聖誕快樂，仲戴咗副黑超扮抹眼淚，然後喊住口咁振臂高呼：「單身萬歲」。用呢個方式提醒大家注意聖誕期間交通安排確實有啲新意，難怪網民都喺佢哋fb讚有創意同畀like。

    李八方
    empty
    報道結尾，阿安戴番副超抹抹眼淚，高呼單身萬歲。