【ecjobs青雲路】唔做醫生賣漢堡 用本地食材有本土味
青雲路Honbo漢堡
在美國行醫的Michael,回港後卻另闢蹊徑,走入廚房以心愛的漢堡創業,更以選用本地食材鮮製作招徠。
「漢堡係肉扒、麵包、配菜及醬料嘅結合,其實要做好多功課,做多一兩個steps,甚至係好少好少嘅details,客人係食得出!」本在美國行醫的Michael,在16年回香港探望父母,原本計劃數年後會到外國繼續行醫,因他愛吃漢堡,而香港卻少有特色漢堡店,令他產生開店做老闆的念頭,開拓另一門自己有興趣的事業,他更從本地購入新鮮食材,希望造出有本土特色的漢堡。
Honbo的老闆Michael認為漢堡的口味愈local愈好,所以捨棄坊間全以外國食材製作漢堡的方式,反而選取本土優質食材作主打。「喺德國引入美國嘅漢堡,點解會成為美國嘅標記?因為用上當地嘅食材,造出自己嘅風格,所以我造嘅漢堡主要選擇本地嘅材料,好似每日入新鮮運到嘅元朗水耕菜。」
Michael說他認識的法國菜餐廳老闆,他們會採用本地雞、本地蛋、本地菜,不會拘泥一個Made in America的標記。「漢堡入面嘅牛肉,我用咗USDA(美國農業部)牛肩脊及牛肋條,混合本地新鮮牛筋腩製作,每塊扒起碼有三分之一係本地牛,入口香脆鬆化。嚟緊我打算推出一個100%、連牛都用本地嘅全本土漢堡。」為了找好的供應商,Michael便時常去一些展銷會及農墟,尋找優質和穩定的貨源。
就連不少漢堡店忽略的麵包,Michael也堅持自家製作。「點解好多人都造唔到一個好食嘅漢堡?其實佢哋都忽略咗麵包,唔少坊間嘅漢堡店用現成入貨嘅麵包,但我就用美國傳統嘅薯仔粉造包。我有搵麵包師傅合作,試過後只有薯仔嘅香及甜,卻冇嗰種煙韌,最終用6、7個月搵材料,試咗無數款麵包,終於搵到一種湯種,打入薯粉造包。」
10個客6個叫牛
湯種是日本人的發明,在製作時將麵粉用熱水糊化,使其吸水力提升,再加麵團發酵,造出來的麵包如糯米糍般煙韌,又帶點濕潤。Michael說:「客人嚟到,10個有6個都叫帶有牛肉嘅漢堡,不過軟殼蟹漢堡、帶子漢堡及素食包等幾受歡迎,啱啱喺2月新推出韓式炸雞漢堡。」
今年29歲的Michael,在加拿大蒙特利爾留學修讀生物化學,然後到愛爾蘭讀醫,合共花了7年時間獲取執業資格,再往美國當了醫生近兩年。「雖然做醫生係自己嘅夢想,但由中學開始就到海外留學十幾年,好似錯過咗好多同屋企人相處嘅時間,我見爸爸嘅身體唔太健康,就決定返香港一段時間。」
留學最愛食漢堡
曾在美加留學及工作的Michael很喜歡吃漢堡,也愛自己下廚,「最平兼快靚正嘅美食就係漢堡,食過好多家唔同嘅漢堡店、美食車,各有唔同嘅種類及變化,好似用唔同嘅配料、醬汁,有冇芝麻,邊間個包會甜啲或胡椒味重啲等。只係一個小小嘅紐約Manhattan區,就有過百間唔同特色嘅漢堡店,唔似香港一味食麥當勞。」16年回港後,Michael覺得香港的漢堡大多不好吃,便決定以漢堡創業,開一間屬於香港的漢堡店。
棄醫從廚,Michael的家人卻沒有太大意見。「家姐係會計師出身,亦有做生意,數口精,佢覺得香港市場有呢個空間去做。父母都好支持,認為我哋鍾意做乜就做乜。」決定開店,找鋪位卻花了超過半年時間。「我想營造一種休閒嘅感覺,最終喺灣仔日街搵到合適嘅鋪位,雖然冇皇后大道東等大街咁多人流,但做到我想要嘅嘢,可以畀食客食得悠閒兼寫意。」
光環效應
此外,Michael認為這一帶被高級商廈及住宅包圍,靜中帶旺,而且他較為欣賞的兩家漢堡店,蘭杜街的The Butchers Club及永豐街的Beef & Liberty都在附近,他認為能在這裏開店會有光環效應。「如果我嘅生意做得住,即表示我同佢哋有同一level嘅實力,差極都有個限度,所以鍾意食漢堡嘅客人,都會嚟試我嘅漢堡。」
17年3月,經過6星期的裝修,Honbo終於開業。Michael表示:「原本這間5百幾呎嘅鋪位係賣手袋,可能有人認為小店唔需要裝修,雖然我嘅佈置睇落只係用簡單嘅物料,但最花心思係點樣砌出自己嘅風格,建立出一個品牌。」店內最花心思、最貴的是橙紅色霓虹燈管「One More Bite」的標誌,將香港特色燃亮起來。
打咭畀like吸人氣
近年香港人愛到食店打咭,Michael也特意在門外牆身裝修成一個方型的木框fit到instagram,方便食客影相。「食客能夠打咭畀like,有助build up人氣。」廚房則像一般漢堡包店的設計,內有炸爐、扒爐及雪櫃等。「開放式廚房喺香港較難拎牌,加上漢堡店嘅油煙較大,開放式唔合適。」
Michael說經營以來,最困難是在人手。「小店人手緊張,如果有1、2個員工返唔到工,我就要一腳踢由朝忙到晚。」首半年Michael沒有特地宣傳,但已有雜誌報刊前來採訪。「最近眼見出品嘅質素開始穩定,呢排有喺facebook、instagram做宣傳。」未來Michael想過大海,在九龍或荃灣開分店。「近年荃灣有好多新樓盤,大部分都係有經濟能力嘅居民及年輕嘅客人,喺呢區開漢堡店相信都幾適合。」
原隻軟殼蟹炸得鬆脆惹味,配以黑色的漢堡包,賣相出色。Soft Shell Crab Burger
$118
今年2月,Honbo與韓國啤酒廠Magpie Brewing合作,除供應他們的手工啤酒外,更推出炸雞漢堡配搭,大大塊雞扒配上僅醃一天的生泡菜及秘製韓式辣醬。Hot Chicken Burger $100
配菜也以本地番薯厚切,啖啖都是薯香。Thick Cut Sweet Potato Fries $43
兩塊兩安士的漢堡扒夾雜芝士品嘗,是「Honbo」的signature!Honbo $98
Honbo前臨的行人道像平台,營造一個舒適的氛圍,讓食客悠閒地拍照。
半溶的芝士配上肉味濃郁的漢堡扒,還夾雜元朗水耕菜,麵包鬆軟可口。Cheese Burger $98
Michael說漢堡看似很容易製作,其實不少細節如爐溫、調味、配菜等都要一一考慮。
除韓國Magpie Brewing手工啤酒外( 小$38、大$68),Honbo亦有本港手工啤酒品牌門神供應($68)。
客人Daniel表示:「我覺得呢度環境舒服,幾鍾意食軟殼蟹漢堡,入口香脆。」
客人Joy表示:「呢次係我第一次吃炸雞漢堡,雞扒大塊帶辣,味道幾吸引。之前有食過牛肉漢堡,味道係喺其他餐廳食唔到。」
以Honbo的口號「One More Bite」在店內製成霓虹光管招牌,有自家及本港特色。