中軟國際（354）半個月調整咗30%，係時候翻兜。今年2月8號主打中軟，去到6月1.30元，最高回報率1.4倍，以最新收市價0.90元計，回報率近70%。睇落幾勁，但1年累計，中軟係冇郁過。近磅股浪潮（596），1年累升咗43%，查實中軟價殘好落後。
中軟最新P/B0.95倍，同樣係IT股、中訊軟件（299）1.5倍，浪潮P/B更加係挨近4倍水位。講P/B，中軟亦係吸引到痹。中軟08年度（12月底止）純利跌咗45%到6333萬銀人仔，但包括咗好多無形資產撇減。要咁睇，中軟客仔包括阿爺政府部門單位，同埋好多大國企。祖國阿爺要谷起經濟，連埋集團本身客戶優勢，實情大把世界。中軟09年度純利，上番07年度1.15億銀人仔，應該冇問題，預期PE得6倍幾，亦係好吸引。以中軟翻半番到1.35元計數，預期PE仲係單位數，P/B亦有排未追到近磅股。

寶威炒同氣連枝

寶威（024）同上邊中軟一樣，1年累積升得9%，實情又係冇點郁過，現價（0.218元）相對NAV0.44元折讓50%，已經唔錯嘅折讓打底。又寶威08年度（12月底止）見紅1.4億銀，但主要係要撇減聯營商譽2億銀。09年度再無受撇減影響，已經可以回復純利狀態。而集團聯營華彩（8161）對上星期五，單日升咗近30%，寶威又有同氣連枝概念。當係短打，博升20%到0.26元，亦係未有耐上到NAV水位。
錢雋