江若琳呢排好忙，除咗要忙住回應緋聞，仲要忙做嘢，佢前晚同關楚耀出席一個萬聖節活動，噚日又同文詠珊（JaniceMan）、Nelson等出席一個美容大賞活動。早兩日正同寰宇老闆林小明辦緊離婚手續嘅林太趙雪英話佢忍唔住會爆料，就呢件事問江若琳？佢話：「唔係事實嘅嘢我唔會回應，成日都關我事，呢啲係老闆同老闆之間嘅事，係佢哋嘅私人問題，我唔講太多。」
但係呢件事越傳越負面，問江若琳會唔會搵林太傾吓偈？佢話：「我只係一個小員工，一個公司藝人，佢哋嘅事我唔想知太多，清者自清，希望快啲完結。」講到揀偶條件，佢話：「做藝人都想搵個人依偎吓，幕前就唔好啦，幕後都OK，林老闆就唔得。男朋友大我10年都可以，不過一定要單身，離過婚都唔得。」

JaniceMan唔想講

至於JaniceMan呢排同江若琳拍緊電影，問佢信唔信對方係第三者？佢話：「唔清楚！佢自己會交代番，我哋好少傾私人嘢，其他嘅嘢唔想講，我淨係覺得佢（江若琳）份人好樂天。」另外，Nelson講到日前關寶慧被襲件事，佢話：「佢只係擦傷咗，當晚係我約佢哋出嚟飲嘢，不過我早走咗，如果唔係我可以幫手做調停啦！」