雖然三番四次否認會同財爺曾俊華拍住上出戰新一屆特首，但立法會前主席曾鈺成嘅舉動，確實令人唔信佢就此止步，尤其冇咗梁振英呢個勁敵後改為向後備大熱政務司司長林鄭月娥抽水，係咪令人想入非非？噚日接連喺facebook同專欄同步出擊，藉落區暗寸西環挺梁又如何，兼叫林鄭唔好亂畀梁粉上船免翻船。

有心有力做引體上升

近排坊間盛傳曾俊華兼曾鈺成都俾中央亮紅燈阻止參選，曾鈺成不以為然，喺fb上載噚日朝早落區見街坊嘅風騷相，寸爆留言「去西環打招呼，反應非常正面」，係人都知西環係挺梁，呢番說話係咪好有意思？佢同時hashtag「#真落區#幾時都落」，疑似諷刺閂門會梁粉嘅CY；仲貼出做引體上升嘅相，唔通係想證明自己有心有力？
同日佢喺《am730》專欄亦再藉虛擬對話出招，藉評論特首選戰暗寸CY之前喺秘魯見習近平後笑意盈盈，令梁粉以為CY篤定連任，認為換人機會等於零，「現在唯有希望林鄭改變初衷，願意出來承擔大任」。
佢之後話林鄭講明CY係佢最親密夥伴，對CY忠心耿耿，「她和大多數人一樣，一直沒想到CY會不連任，當然不會考慮自己出來選特首，挑戰CY。現在情況發生重大變化，她應該當仁不讓了」，然後指林鄭嘅忠誠同能力，中央同港人有目共睹，梁班子一定樂意過檔幫忙，問題卻係「如果我是林鄭，我可不敢讓剛把CY的船弄翻了的人爬上我的船」。

李八方
mailto:[email protected]